ازيكو يا احلى عرايس عاملين ايه ؟
احنا كلنا بنحاول ندور على طرق نسعد بيها ازواجنا المستقبليين ان شاء الله و كمان نبقه حاسين بثقة في نفسنا و احنا قريبين منهم
و اكتر حاجة تجذب الراجل لمراته ريحتها الحلوة المميزة
انا جيبالكو النهاردة طرق لتعطير الجسم من اهم مميزاتهم انهم مش مكلفين نهائي و في نفس الوقت بخامات طبيعية فمافيش خوف من حساسية و لا تاثير غلط على البشرة و كمان الريحة الجميلة بتفضل اليوم بطولة و تاني يوم كمان
و كمان الطرق مجربةةةة يعني مش منقول و بجرب فيكو
الطريقة الاولى:
تجيبي زيت جونسون للاطفال بالصبار و تروحي للناس بتوع تركيب العطور و تجيبي من عنده زيت البرفان اللي انت بتحبيه و تحطي الاتنين على بعض
و بعد ماتاخدي الشاور بتاعك و تطلعي ماتنشفيش جسمك بالفوطة جامد لأ.. تنشفيه بطريقة الطبطبة علشان يفضل رطب و بعدين تدهني من الزيت اللي انت محضراه يادوب مسحة بسيطة على كل حتة في جسمك و البسي هدومك
هتلاقي ريحة البرفان لازقة في جلدك و مش بتطير نهائي لحد تاني يوم و الميزة انك تقدري تحطي الزيت ده على المناطق الحساسة بس طبعا من بره بس يعني استعمال خارجي
انا جبت زيت برفان اسمه بريتني سبيرز عشان من الحاجات المسكرة "sugary"
فالريحة بتطلع تجننننننن و ممكن تجيبي العطور الشرقية زي العود و كده لو بتحبيها تبقة جميلة بردو
زيت جونسون العبوة الصغيرة ب 7 جنيه و زيت البرفان انا جبت ب 10 جنيه =17 جنيه
الطريقة التانية:
تجيبي من العطار زيت ياسمين او ورد اللي انت تحبيه و بعد ماتخدي الشاور الجامد تملي البانيو ميه دافية و تحطي معلقتين كبار من الزيت في المياه و تعدي فيها حوالي ربع ساعة و بعدين تتطلعي تتنشفي بنفس الطريقة اللي فاتت و تحطي من الزيت اللي استعملتيه نقطة بسيطة على اماكن النبض (الرسغ و الرقبة و خلف الاذن) و نقطة صغيرة خاالص على فرشة الشعر بتاعتك و تسرحي بيها
مش هتصدقي الريحة الجميييييييييييلة اللي هتملا البيت كله مش انت بس
ازازة الزيت ب 10 جنيه تكفيكي حوالي 15 مرة
الطريقة التالتة :
انسيييي خالص ريحة العرق و انسي كمان مزيلات العرق الكيماوية و الكريمات اللي كلنا عارفين انها لا قدر الله بتسبب امراض وحشة اوي
تجيبي مسك مطحون من عند العطار و تجيبي شبة مطحونة بردو و تحطيهم على بعض بس اهم حاجة اتاكدي ان الاتنين مطحونين حلو اوييي عشان ده سر نجاح الطريقة دي
و سري الخاص بقة اني بزود عليهم شوية من بودرة الانشانتير اللي ريحتها تهبلللل انا بجيب اللي هي لونها موف خطيرة و تحطي منها بعد الدوش على طووووووول في مكان الابط تحت الذراع و سوري يعني بين الصدر ... تلات ايام بحالهم مافيش ريحة عرق نهااائي خاصة لو انت عارفة انك رايحة مشوار في الشمس او هتمشي كتير او هترقصي
انا جبت المسك على الشبة جاهزين من عند العطار ب 5 جنيه يكفوكي اكتر من شهرين
بس اهمممم حاجة تحطيهم في برطمان مقفول كويس عشان مايرطبش
يلا كله يجرب من دلوقتي و شوفي انهي طريقة هتعجبك اكتر و استمري عليها
وصية بقة كل اللي تعمل طريقة و تعجبها تدعيلي بظهر الغيب ان ربنا يتمم جوازي على خير و يشفي حماتي اللي بعتبرها والدتي بالظبط و يرزق خطيبي ... امين يا رب
و مش هوصيكو تكتبولي رد او تقييم عشان انا عارفة اللي هيعجبها الموضوع هتعمل كدة من غير ما اقول ها
اذا اعجبك الموضوع و اردت نشره في المنتديات الاخرى فاستخدمي هذا الرابط:
الجمعة نوفمبر 29, 2013 3:06 am من طرف ساعية لرضى الله
